Sjóminjasafn Íslands - Vitar

Vitar

Wed, 10 Jun 2009 15:26:00 +0000

N/A

Siglunesviti

Fri, 12 Jun 2009 15:27:00 +0000

Sumarið 1908 var Siglunesviti byggður og tekinn í notkun það sama ár. Þetta var fyrsti viti á Norðurlandi. Notuð var teikning og hönnun Thorvalds Krabbe á Dalatangarvita að undanskildu sambyggðu íbúðarhúsi.

Urðaviti

Mon, 8 Jun 2009 11:11:00 +0000

Fyrst var reistur viti á Urðum austast á Heimaey árið 1925. Sá viti fór undir hraun í eldgosinu 1973. Skömmu eftir að gosi lauk var Urðaviti endurreistur á nýju landi úr iðrum eldfjallsins. Tvisvar fór hann í sjóinn því hratt braut af nýja hrauninu.

Stórhöfðaviti

Mon, 8 Jun 2009 11:11:00 +0000

Stórhöfðaviti var byggður árið 1906 af Gísla J. Johnsen kaupmanni í Vestmannaeyjum eftir teikningum dönsku vitamálastofnunarinnar og danskir tæknimenn komu ljóstækjum fyrir. Mannvirki það sem þá reis var steinsteypt hús með vitaturni, 7,2 m að hæð með viðbyggingu fyrir vitavörð sem í fyrstu dvaldi þar einsamall. Árið 1910 var byggt bárujárnsklætt timburhús yfir vitavörð og fólk hans enda var þá kominn fjölskyldumaður í vitavarðarstarfið. Nýtt vitavarðarhús var byggt árið 1931 og var það stækkað árin 1964–1965 í núverandi horf.

Dyrhólaeyjarviti

Mon, 8 Jun 2009 11:10:00 +0000

Fyrst var reistur viti í Dyrhólaey árið 1910. Þetta var sænskur járngrindarviti og var fyrsti járngrindarvitinn sem settur var upp hér á landi.

Skaftárósviti

Mon, 8 Jun 2009 11:09:00 +0000

Árið 1911 var reistur járngrindarviti á Rifstanga á Melrakkasléttu sem stóð fram til ársins 1953 að hann var tekinn niður og fluttur að Skaftárósi þar sem hann stendur nú. Er þessi viti elsti járngrindarviti landsins.

Hvalnesviti

Mon, 8 Jun 2009 11:08:00 +0000

Hinn 11,5 m hái Hvalnesviti er byggður úr steinsteypu og er ljóshúsið innbyggt eins og í öðrum brúarvitum. Axel Sveinsson verkfræðingur og Einar Stefánsson húsateiknari hönnuðu þennan vita. Vitinn var byggður árið 1954 og tekinn í notkun árið eftir.

Æðarsteinsviti

Mon, 8 Jun 2009 11:08:00 +0000

Æðarsteinsviti var byggður árið 1922, en það ár voru margir vitar reistir á Austurlandi. Vitinn er byggður eftir teikningu verkfræðinganna Thorvalds Krabbe og Guðmundar J. Hlíðdal og eru Svalvogaviti og Karlsstaðatangaviti sömu gerðar.

Streitisviti

Mon, 8 Jun 2009 11:08:00 +0000

Fyrst var reistur viti á Streitishorni árið 1922 er þar var settur upp járngrindarviti sem smíðaður hafði verið á járnsmíða- verkstæði ríkisins í Reykjavík. Þessi viti var starfræktur fram til ársins 1958 en var þá fjarlægður þar sem byggður hafði verið viti á Hlöðu, skeri í sunnanverðu mynni Breiðdalsvíkur. Hlöðuvitinn féll um koll í miklu óveðri og sjógangi í janúar 1984 og var núverandi Streitisviti byggður í staðinn það ár.

Dalatangavitar

Mon, 8 Jun 2009 11:07:00 +0000

Otto Wathne útgerðarmaður á Seyðisfirði byggði vita á Dalatanga árið 1895 fyrir eigið fé til að greiða fyrir siglingum til Seyðisfjarðar. Hann sá sjálfur um byggingu vitahússins en danska vitamálastofnunin lagði til ljóstæki, steinolíulampa og spegil til að magna ljós hans. Að byggingu vitans lokinni tók landssjóður að sér rekstur hans.

Kolbeinstangaviti

Mon, 8 Jun 2009 11:07:00 +0000

Vitinn var byggður árið 1942 og tekinn í notkun tveimur árum síðar þegar ljóstæki í hann fengust loks frá Englandi. Kolbeinstangaviti er 19,5 m að hæð og er byggður eftir sömu teikningu og Kálfshamarsviti. Vitinn var húðaður með ljósu kvarsi en hrafntinnumulningur er á dökkum flötum. Vitinn heldur þessum sérkennum sínum óbreyttum og er eini vitinn sem hafði þetta útlit sem ekki hefur verið kústaður með einhvers konar þéttiefni.

Raufarhafnarviti

Mon, 8 Jun 2009 11:06:00 +0000

Raufarhafnarviti var byggður árið 1931 eftir teikningu Benedikts Jónassonar verkfræðings. Vitinn er steinsteyptur með sívölu sænsku ljóshúsi. Gasljós var í honum fram til 1963 að hann var rafvæddur.

Rauðanúpsviti

Mon, 8 Jun 2009 11:06:00 +0000

Fyrsti viti sem reistur var á Rauðanúp var járngrindarviti sem settur var þar upp árið 1929 en núverandi viti var byggður árið 1958. Hann er 7,9 m að hæð og byggður eftir teikningum Eggerts Steinsen verkfræðings.

Tjörnesviti

Mon, 8 Jun 2009 11:05:00 +0000

Tjörnesviti var byggður árið 1929 eftir teikningu Benedikts Jónassonar verkfræðings. Vitinn er 12,6 m að hæð, steinsteyptur með sænsku ljóshúsi. Gasljós var í honum fram til ársins 1971 að hann var rafvæddur. Steinsteypt handrið Tjörnesvita heldur sér enn, en slík handrið eru nú sums staðar horfin af vitum frá svipuðum tíma. Vitinn var upphaflega hvítur að lit.

Hríseyjarviti

Mon, 8 Jun 2009 11:02:00 +0000

Vitinn var byggður árið 1920 eftir teikningu verkfræðinganna Thorvalds Krabbe og Guðmundar J. Hlíðdal. Ljóshúsið er áttstrent, smíðað á Íslandi. Gasljós var í vitanum fram til ársins 1987 að hann var rafvæddur.

Sauðanesviti við Siglufjörð

Mon, 8 Jun 2009 11:02:00 +0000

Vitinn var byggður á árunum 1933–1934 eftir teikningum Benedikts Jónassonar verkfræðings og var í senn ljósviti og hljóðviti. Einnig var reist hús fyrir vitavörð.

Hegranesviti

Mon, 8 Jun 2009 11:01:00 +0000

Hegranesvitinn, 9,6 m að hæð, var byggður árið 1937 samkvæmt teikningu Benedikts Jónassonar verkfræðings. Upphaflega var vitinn með steinsteyptu handriði og bogaþaki á anddyri sem nú hefur verið breytt. Vitinn var hvítur að lit með rauðri rönd um sig miðjan fram til 1966 að hann var málaður gulur.

Kálfshamarsviti

Mon, 8 Jun 2009 10:59:00 +0000

Árið 1913 var fyrst reistur viti á Kálfshamarsnesi. Það var áttstrent norsksmíðað ljóshús úr steypujárni sem nú er á Straumnesvita í Sléttuhlíð.

Skarðsviti

Mon, 8 Jun 2009 10:58:00 +0000

Skarðsviti á Vatnsnesi var byggður árið 1950 eftir sömu teikningu og Æðeyjarviti. Vitinn er 14 m að hæð, á honum er sænskt ljóshús.

Æðeyjarviti

Mon, 8 Jun 2009 10:53:00 +0000

Vitinn í Æðey í Ísafjarðardjúpi er steinsteyptur sívalur og kónískur turn, 12,8 m að hæð, byggður árið 1944 en ekki tekinn í notkun fyrr en 1949 vegna skorts á ljóstækjum. Hönnuður var Axel Sveinsson verkfræðingur. Ljóshús og ljóstæki fengust loks frá Englandi. Eins og tíðast var um vita á þeim tíma var gasljós í Æðeyjarvitanum í upphafi og fram til ársins 1988 að hann var rafvæddur.

Arnarnesviti

Mon, 8 Jun 2009 10:52:00 +0000

Fyrst var byggður viti á Arnarnesi við Skutulsfjörð árið 1902 en núverandi viti er járngrindaviti frá 1921 klæddur bárujárni. Ljóshúsið er íslensk smíð. Vitinn er 5,4 m að hæð. Í honum var gasljós fram til 1964 að hann var rafvæddur.

Langanesviti í Arnarfirði

Mon, 8 Jun 2009 10:52:00 +0000

Vitinn stendur innanvert við Arnarfjörð og er auðséður þótt smár sé vegna gula litarins sem er tilkominn vegna óska sjómanna sem þykir auðvelda að koma auga á vitana svona lita. Áður en vitinn var málaður gulur var hann húðaður með ljósu kvarsi.

Ólafsviti í Patreksfirði

Mon, 8 Jun 2009 10:51:00 +0000

Ólafsviti var byggður árið 1943 fyrir fé sem erfingjar Ólafs Jóhannessonar kaupmanns á Patreksfirði gáfu í því skyni. Þar sem ekki tókst að afla ljóstækja í vitann meðan á seinni heimsstyrjöld stóð var hann ekki tekinn í notkun fyrr en 1947.

Bjargtangaviti

Mon, 8 Jun 2009 10:51:00 +0000

Núverandi Bjargtangaviti er annar í röðinni. Sá fyrri, núverandi Hvaleyrarviti, var reistur þar árið 1913 en fluttur brott árið 1948 þegar yngri Bjargtangavitinn var tekinn í notkun.

Súgandiseyjarviti

Mon, 8 Jun 2009 10:51:00 +0000

Þegar ljóshúsinu í Súgandisey var komið þar fyrir árið 1948 sem innsiglingarvita til Stykkishólms- hafnar var það enginn nýliði í vitaþjónustunni því það hafði verið á Gróttuvita frá árinu 1897. Ljóshús sömu gerðar er á Siglunesvita.

Malarrifsviti

Mon, 8 Jun 2009 10:50:00 +0000

Fyrst var reistur viti á Malarrifi árið 1917. Það var 20 m hár járngrindarviti sem smíðaður var í Reykjavík, fluttur í hlutum á staðinn og settur þar saman. Eins og margir þeirra járngrindavita sem byggðir voru hérlendis lét eldri Malarrifsvitinn fljótt undan síga fyrir veðrun og ryði og árið 1946 var núverandi viti byggður í hans stað.

Arnarstapaviti

Mon, 8 Jun 2009 10:50:00 +0000

Vitinn er 3 m hátt steinsteypt hús af brúarvitagerð þar sem ljóshúsið er innbyggt. Vitinn var byggður árið 1941 eftir teikningum Axels Sveinssonar verkfræðings og var upphaflega með svörtum og gráum láréttum böndum. Tvö þeirra eru innfelld og voru þau húðuð með hrafntinnu en ljósir fletir vitans með ljósu kvarsi. Nú hefur vitinn verið kústaður með hvítri sementsblöndu.

Kirkjuhólsviti

Mon, 8 Jun 2009 10:49:00 +0000

Kirkjuhólsviti fyllir flokk hinna svokölluðu brúarvita sem svo eru kallaðir vegna þess að lag þeirra þykir minna á skipsbrú. Í vitum af þessu tagi er ljóshús og vitaturn sambyggt.

Akranesvitar

Mon, 8 Jun 2009 10:49:00 +0000

Tveir vitar standa utarlega á Skipaskaga. Sá eldri er utarlega á Syðriflös, steinsteyptur turn, byggður árið 1918. Ljóshús hans hefur verið endurnýjað og er ekki upprunalegt og þessi viti, sem hannaður er af Thorvald Krabbe verkfræðingi, hefur ekki verið í notkun síðan árið 1947 að kveikt var á nýrri vitanum sem stendur skammt ofan við flösina.

Hvaleyrarviti

Mon, 8 Jun 2009 10:48:00 +0000

Árið 1948, þegar síldveiðar voru miklar í Hvalfirði, var komið fyrir á Hvaleyri norsku ljóshúsi úr steypujárni sem stendur á steinsteyptum stöpli. Þetta ljóshús var áður á Bjargtöngum, var sett þar upp árið 1913.